Site hosted by Angelfire.com: Build your free website today!
« September 2010 »
S M T W T F S
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30
Entries by Topic
All topics  «
Blog Tools
Edit your Blog
Build a Blog
RSS Feed
View Profile
You are not logged in. Log in
In His Own Time
Thursday, 23 September 2010
Galulue mo se viiga o le Atua, ae le o le tagata

Taeao manuia! Sa ou iai i le facebook ma ou mauaina ai le autu o le Aso Sa na se mavae atu nei. E faapea: "Galulue mo se viiga o le Atua, ae le o le tagata". Sa ou manatu ai o se mataupu manaia mo se talanoaga ae maise lava i totonu o le galuega a le Atua- le mea o e tupu ai i lenei vaivaiga. Ae le na o totonu foi o le galuega e tupu ai. E pei ona faamatalaina i tusi na aumai, o le tala i le tupu o Asueru ma Hamanu.

A o tupu Asueru ia Isaraelu, na iai le alii o Hamanu i lona nuu. I se tasi aso sa manatu ai Asueru e faasilia le nofoa o Hamanu i le saofaiga a alii on le nuu. Na ia poloaia foi ana auauna ina ia ifo atu ia te ia. O le anoano na ifo ma toatutuli ia Hamanu. Peitai Moretekai le Ituaia na faafiti. Ua ita tele le alii o Hamanu i lenei tala, ma ua oo foi i luma o le tupu o Asueru le mataupu, faatasi ai ma se fuafuaga a Hamanu i lona ita tele, ina ia faaumatia tagata Iutaia. Sa talia e le tupu o Asueru, ma ua faasalalau i le nuu uma lenei osofaiga. O Iutaia e ese le gagana ma ua le malamalama i latou i lenei faaaliga. O le mea na tupu, ua maua e tagta uma le avanoa e sosola ese ai ma sefe o latou ola, ae ua toe ai nao Iutaia e faaumatia.

O le vaega taua lenei o le tala. O le fesili na tupu a'e: "O le a ea le fesootaiga o lenei tala ma le autu o le aso?"

Maitau mai o le autu o le aso o le "galulue mo se viiga o le Atua, ae le o le tagata".

O se faafaigofieina o lenei mataupu, e ofi mai ai le mataupu lea e ita tele ai tatou o le faalata valea ma le faa'au'au. Na avatu e Asueru le pule ia Hamanu ona o lona tagata, atonu e mafai foi taua o se taui o ana galuega. O ii ua manino ai le tauia e tagata o galuega a tagata e aunoa ma se manatu lelei, po o se faaiuga lelei o le a faia. E le o se faailoga tagata foi, ae o le manatu i le lelei lautele o tagata. E iai tagata e le talafeagai iai le pule tele, ona e oo faaaoga sese e nisi. I lenei tala, o Hamanu lenei tagata.

Ae ina ua alu atu foi Hamanu ia Asueru ma lana fuafuaga, atonu lava na iai ni popolega ia Asueru, ae atonu ai ua natia e le mafana o le mafutaga ua fai. Ua natia ai e le naunau i le mafutaga faaletino le manatu tonu ma aafia ai le ola o le toatele. O se mea e manino tele le leaga o le fuafuaga na faia, aua ua taua lava i le Tusi Paia o le fasioti tagata o se mea leaga. Mai i lenei vaega o le tala, tatou te tali atu i le autu o le aso i le Amene, ma faaopoopo ai o le iuga o le faia o le galuega mo se viiga o le tagata, o le (1) natia o le mea tonu ma le sao, ina nei lepeti le mafutaga faaletagata, (2)E tofia ai taitai le agavaa e taitai ma iu ai i le mea sese ma le leaga (3)E i'u i le oti. Uso e, atonu ua mafai ona tatou faapea: O le galulue i se viiga o le tagata, e iu i le matelaina ma le oti.

O le isi vaega taua o le tala o le tala o le vaega taua a Moretekai e faiai i le tala. Na faafiti e ifo atu ia Hamanu. E le loloto so'u iloa i le mafuaaga tonu, ae e manino o le itu Iutaia o Moretekai na faafiti ai. E le ifo Ituaia i atua ese, ao le Silisili Ese. Na tumau pea Moretekai i lona Atua. O le mea faanoanoa, na faaumatia le nuu o Moretekai. O le nuu amiotonu ua tafieseina ma le laueleele. O fea o le a aumai ai la se tonu pe afai o lea ua ave ese atu e o iai le amio tonu? O le fesili lena e fesili ai. Tatou te tali pea lava pea: O loo soifua le Atua e faamalamalama. Ae tatou vaai iai i le mea e tupu pe a faia faaiuga i le vaaiga a le tagata. E ave ese ai le sa'o ma le tonu, ae toe ai na o le sese male leaga. E mafai foi la ona tatou faapea: O le faia o faaiuga i lea vaaiga o le aveesea lava lea o le lelei ma le tonu i o tatou tagata.

 

Ae i le Feagaiga Fou, o le faaauauga o le lauga a Iesu i luga o le mauga. I lenei lava tusi, na faamamafa ai le foai ma galuega fai. A faitau iai o loo iai ni manatu loloto, aua ua fetalai Iesu: "aua ne i iloa e lima taumatau le galuega a le lima tauagavale" E le manaomia e le tagata le taui a le tagata, e le afaina foi la pe iloa e tagata se galuega lelei ua faia, pe afai e talitonu le tagata i le mafutaga lilo ma lona Atua. 

Aofaiga: "Galulue mo se viiga o le Atua, ae le o le tagata".  O le fesili: Aisea? O le galuega a le Atua e le na o le lotu. Afai e talitonu le tagata i lana mafutaga ma le Atua, ma feoai pea lava pea ma le Atua, e le faailogaina se galuega o se galuega a le Atua. O le mea foi lena e filifili ai le tagata i le galuega e galue ai, ma o lena foi le eseesega tele o galuega lelei ma galuega le lelei. E ese la le galuega lelei ma galuega faigofie. O galuega uma a tuu iai le faimea mafai e uma, ae ole tagata finau e faapea mai: E faigofie, ao le e vaivai le loto e augani mo se fesoasoani, aua ua manatu i le tiga.

E filifili le tagata i le galuega e galue ai, aua o lena le mea o le a e faalia ai le tino o le Atua i le lalolagi e ala i lou lava tagata. Fesoasoani i tagata, e ala i le faiaoga po o le faafomai. Puipui i tagata, e pei ona iai le faaleoleo ma le galue i vaega'au a le malo. Faailoa i tagata, e pei ona iai le galuega talai ma le faafaifeau. Ia ma nisi lava galuega laiti, e iai uma lava le mea lelei o faatinoina ai; pe laititi pe tele le eseesega e tupu mai ai.

E iai le tofiga a le Atua i tagata taitoatasi, a o le mea taua, ia faia le galuega i le viiga o le Atua. Faia ile auala e fiafia ai le Atua. E finagalo o Ia i le lelei, faapei o tatou uma ia o tatou galuega uma. E le manaomia la se tusi e faitau ai pe faapefea le auala i filifiliga i lea galuega ma lea galuega. E le eseese foi. O iai uma i le Tusi Paia. Fesili i le Atua e ala i le Tusi Paia. Afai e le o ta'ua i le Tusi Paia, e le i'u i se lelei lea filifliga. O le mea taua la o le a avatu.

E manuia mea tatou te faiai pe tatou savavali i ala o le Tusi Paia. Talitonu Mai! A uma la se galuega i le lelei, tatou te fiafia ma oliol. O o tatou tino na faatinoina- le vaaiga lena faaletagata. A o fea na aumai ai mafaufauga? O ai foi na fesili iai? O le tusi foi a ai na faitau ai? O le puipuiga foi a ai ua manuia ai? O le Atua. Nei galo a lenei vaega taua. Tatou talia nei loa la "O mea lelei uma e mai ia te Ia". Tatou te fiafia pea i le galuega ua tatou fai, ae ia sili ona tatou faafetai ia te Ia.

O le fiafia e le aofia ai le taliaina o le viiga i se mea ua fai. O le fiafia ia o le fiafia. E maua pea lava le fiafia, tusa lava foi pe leai se mea ua faia e le tagata lava ia. E maua le fiafia i mea e faia e isi, e pei o ata tifaga ma tusi faitau poo se tala fiafia lava foi ise faiva ua a'e manuia a se uso. E le manaomia le faaofi atu o tatou lava tagata i totonu. A manatu loloto foi iai, a le fiafia i ia mea, ua faaalia ai foi le loto vale. Ae ia fiafia i mea uma e lelei, tusa lava pe le o se galuega a tatou lava lima. Ae afai ua faia e o tatou lima, tatou te fiafia, ae aua lava nei ia te i tatou le viiga. E faigofie foi ona malamalama lea manatu.

Silasila foi, o le faigofie ia ona aloese se isi ma se tasi e talanoa mai lava ia o ia. E le o se loto vale foi, ae o le manatu: E le mafai a ona iai maua i le tulaga e tasi ma le tagata lea, leaga e alu a'e a ia i luga, ina ia i luga atu o a'u. E sa'o lea manatu. O uiga lena o le tagata ua teu ia te ia le viiga. E leai ni ana uo. A iai foi o ni tagata e o atu ona o ana mea, ae le o ia, poo lona tagata ma ona uiga. Faamaulalo o tatou tagata ma tuu atu le viiga i le Atua. E maua ai uo, e laveaiina ai foi o tatou olaga.

E maua foi le filemu male mafanafana i le loto pe a tuu atu le viiga. A teu ia i tatou, ona iai fausia lea o le sefe i le loto e teu ai viiga. A gaogao le sefe, ua faanoanoa. Ae a leai se sefe, e leai se popole i mea e tuu ai totonu. Aua le fauina lea sefe i o tatou loto. O le igoa o le sefe lea o "A'u". A talanoa mai foi la le tagata e iai lana sefe, e na'o le pau lava lena o le upu e to mai- "A'u". A talanoa la ma leisi tagata e iai foi lana sefe, ae tele atu mea e i le sefe a lea tagata, ona oso lea o le faanoanoa, ma amata ai ona fanau le tama o Lotovale. E malepe le sefe ma aafia ai le loto. E faalia lea i le faanoanoa poo le ita. O uiga e le lelei. Ae faatumauina pea le loto mama ma le fiafia pe a leai lava se sefe viiga. Avatu i le Atua e teu ai, ma faamoemoe ia te Ia e aumai ai le taui.

E le manatu le Atua e aumai tagata i lalo nei e avatu viiga ia te Ia. E aumai tatou e faaola agaga o isi, ae pei ona taua, e le ola agaga o isi pe a faapea e pau le upu e iloa ta'u o le "A'u". Ia iloa ona fesootai atu, ae aua le lokaina le sefe, e tapunia ai le loto. E lua la mea e taua ona manatunatu iai. (1)Tatala atu i tagata; fiafia ma talisapai le olaga ua foai e le Atua iate oe; (2)Faia mea uma ia lelei e pei ona finagalo iai le Atua; filifili i le sa'o mo se manuia lautele o tagata.

Na galo ia Asueru le manuia lauaitele o tagata i lona naunau i le va o lona tagata ma Hamanu. Ae le i galo lea ia Moretekai. E faanoanoa ona o le toilalo faaletino o Moretekai, ae olioli, aua i le fuaiupu mulimuli o le tala o loo faapea mai: "Ona la nonofo lea o le tupu ma Hamanu, ua la feinu, a ua atuatuvale le aai o Susana". E le i toilalo Moretekai, aua o le leaga tele o le a mulimuli mai. O le atuatuvale o tagata e iu ai i le leaga.

 E iu leaga le faia o galuega mo se viiga o tagata, ae faamaulalo o tatou tagata. Olioli i le galuega ua mae'a ae afifi le viiga e ofo atu i le Atua, mo lo tatou saolotoga, saogalemu, ae maise le anoanoai o faanmanuiga e mulimuli mai, aua o le Atua o le Atua alofa ia.

I le suafa manumalo o Iesu le Alii ma la Faaola...

Amene!


Posted by leatuaalofaoo at 6:46 AM
Post Comment | Permalink | Share This Post

View Latest Entries